اشعار ترکی شهریار

[گل همیشه بهار]

خان ننه




خان ننه، هاياندا قالدين
بئله باشيوا دولانيم
نئجه من سني ايتيرديم!
دا سنين تايين تاپيلماز
سن أولن گون، عمه گلدي
مني گتدي آيري کنده
من اوشاق، نه آنليايديم؟
باشيمي قاتيب اوشاقلار
نئچه گون من اوردا قالديم
قاييديب گلنده،باخديم
يئريوي ييغيشديريبلار
نه أوزون، و نه يئرين وار
هاني خان ننه م؟ سوروشدوم
دئديلرکه:خان ننه ني
آپاريبلا کربلايه
که شفاسين اوردان آلسين
سفري اوزون سفردير
بير ايکي ايل چکرگلينجه
نئجه آغلارام، يانيخلي
نئچه گون ائله چيغيرديم
که سسيم، سينم توتولدي
او، من اولماسام يانيندا
أوزي هئچ يئره گدنمز
بو سفر نولوبدي، من سيز
أوزي، تک قويوب گئديبدي؟
هاميدان آجيخ ائدرکن
هامييا آجيخلي باخديم
سونرا باشلاديم که: من ده
گئديرم اونون دالينجا
دئديلر: سنين کي تئزدير
امامين مزاري اوسته-
اوشاقي آپارماق اولماز
سن اوخي، قرآني تئز چيخ
سن اوني چيخينجا بلکه
گله خان ننه سفردن
تله سيک راوانلاماقدا
اوخويوب قرآني چيخديم
که يازيم سنه: گل ايندي
داها چيخميشام قرآني
منه سوقت آل گلنده
آما هر کاغاز يازاندا
آقامين گؤزي دولاردي
سنده کي گليب چيخمادين
نئچه ايل بو انتظارلا
گوني، هفته ني سايارديم
تا ياواش ياواش گؤز آچديم
آنلاديم که، سن أولوبسن!
بيله بيلميه هنوزدا
اوره گيمده بير ايتيک وار
گؤزوم آختارار هميشه
نه ياماندي بو ايتيک لر
خان ننه جانيم، نولِيدي
سني بيرده من تاپايديم
او آياقلار اوسته، بيرده
دؤشه نيب بير آغلايايديم
قولي حلقه سالميش ايپ تک
او آياغي باغليايديم
که داها گئدنميه ايدين
گئجه لر ياتاندا، سن ده
مني قوينووا آلاردين
نئجه باغريوا باساردين
قولون اوسته گاه سالاردين
آخي دنيا ني آتارکن
ايکيميز شيرين ياتارديق
يوخودا(لولئي) آتارکن
سني من بلشديرَرديم
گئجه لي، سو قيزديراردين
أوزيوي تميزليهردين
گنه ده مني أوپردين
هئچ منه آجيخلامازدين
ساواشان منه کيم اولسون
سن منه هاوار دوراردين
مني، سن آنام دؤينده
قاپيب آرادان چيخاردين
ائله ايستيليک او ايستک
داها کيمسه ده اولورمي؟
اوره گيم دئيير کي: يوق- يوق
او ده رين صفالي ايستک
منيم او عزيزليگيم تک
سنيله گئديب، توکندي
خان ننه، أزون ديئيردين
که: سنه بهشت ده، آلله
وئرجک نه ايستيورسن
بو سؤزون ياديندا قالسين
منه قوليني وئريب سن
ائله بير گونوم اولورسا
بيليسن نه ايسته رم من؟
سؤزيمه درست قولاخ وئر:
(سن ايلن اوشاخليق عهدين)
خان ننه آمان، نولِيدي
بير اوشاخليغي تاپايديم
بير ده من سنه چاتايديم
سنيلن قوجاقلاشايديم
سنيلن بير آغلاشايديم
يئنيدن اوشاق اولورکن
قوجاغوندا بير ياتايديم
ائلر بير بهشت اولورسا
داها من ئوز آللاهميمدان
باشقا بير شئ ايستمزديم
​

 

[گل همیشه بهار]

اولدوز ساياراق گوزله ميشم هر گجه ياري
گج گلمه ده دير ، يئنه اولموش گئجه ، ياري
گوزلر آسيلي ،يوخ نه قارالتي ،نه ده بير سس
باتميش قولاغيم ،گورنه دوشورمکده دي داري
ياتميش هامي ، بير آللاه اوياقدير ،داها بير من
مندن آشاغي کيمسه يوخ ، اوندان دا يوخاري
قورخوم بودي يار گلمه يه ، بيردن ياريلا صبح
باغريم ياريلار ، صبحوم آچيلما ،سني تاري!
دان الدوزي ايسته ر چيخا ، گوز يالواري چيخما
او چيخما سادا ، اولدوزومون يوخدي چيخاري


​

 

[گل همیشه بهار]

دونيا


سني فرزانه لر آتدي
قاپيب، ديوانه لر توتدي
كيمي آلدي، كيمي ساتدي
ساتان دونيا، آلان دونيا
آتي ازل داغا سالديق
يورولدوقجا دالي قالديق
آتي ساتديق، اولاغ آلديق
يهر اولدي پالان دونيا


​

 

[گل همیشه بهار]

تورکون ديلي


تورکون ديلي تک سئوگيلي ايسته کلي ديل اولماز
اؤزگه ديله قاتسان بو اصيل ديل اصيل اولماز
اؤز شعريني فارسا – عربه قاتماسا شاعير
شعري اوخويانلار ، ائشيدنلر کسيل اولماز
فارس شاعري چوخ سؤزلريني بيزدن آپارميش
« صابير » کيمي بير سفره لي شاعير پخيل اولماز
تورکون مثلي ، فولکلوري دونيادا تک دير
خان يورقاني ، کند ايچره مثل دير ، ميتيل اولماز
آذر قوشونو ، قيصر رومي اسير ائتميش
کسري سؤزودور بير بئله تاريخ ناغيل اولماز
پيشميش کيمي شعرين ده گرک داد دوزو اولسون
کند اهلي بيلرلر کي دوشابسيز خشيل اولماز
سؤزلرده جواهير کيمي دير ، اصلي بدلدن
تشخيص وئره ن اولسا بو قدير زير – زيبيل اولماز
شاعير اولابيلمزسن ، آنان دوغماسا شاعير
مس سن ، آبالام ، هر ساري کؤينک قيزيل اولماز
چوخ قيسسا بوي اولسان اوليسان جن کيمي شئيطان
چوق دا اوزون اولما ، کي اوزوندا عاغيل اولماز
مندن ده نه ظاليم چيخار ، اوغلوم ، نه قيصاص چي
بير دفعه بوني قان کي ايپکدن قزيل اولماز
آزاد قوي اوغول عشقي طبيعتده بولونسون
داغ – داشدا دوغولموش ده لي جيران حميل اولماز
انسان اودي دوتسون بو ذليل خلقين اليندن
الله هي سئوه رسن ، بئله انسان ذليل اولماز
چوق دا کي سرابين سويي وار ياغ – بالي واردير
باش عرشه ده چاتديرسا ، سراب اردبيل اولماز
ملت غمي اولسا ، بو جوجوقلار چؤپه دؤنمه ز
اربابلاريميزدان دا قارينلار طبيل اولماز
دوز واختا دولار تاختا – طاباق ادويه ايله
اونداکي ننه م سانجيلانار زنجفيل اولماز
بو « شهريار » ين طبعي کيمي چيممه لي چشمه
کوثر اولا بيلسه دئميرم ، سلسبيل اولماز
​

 

[گل همیشه بهار]

اويان اويان آذربايجان


کؤنولوم قوشو قاناد چالماز سنسيز بيرآن، آذربايجان،
خوش گونلرين گئتمير مودام خياليمدان، آذربايجان.
سندن اوزاق دوشسم ده من عشقين ايله ياشاييرام،
يارالانميش قلبيم کيمى، قلبي ويران آذربايجان.
بوتون دونيا بيلير سنين قودرتينله، دؤولتينله
آباد اولوب، آزاد اولوب مولکي ايران، آذربايجان.
بيسوتوني اينقيلابدا، شيرين- وطن اوچون فرهاد
کولونگ وورموش اؤز باشينا، زامان- زامان، آذربايجان.
وطن عشقي مکتبينده جان وئرمگي اؤيرنميشيک،
اوستاديميز دئييب هئچدير وطنسيز جان، آذربايجان.
قورتارماق چون ظاليملرين اليندن رئي شومشاديني،
اؤز شومشادين باشدان- باشا اولوب آل قان، آذربايجان.
يارب، ندير بير بو قدر اورکلري قان ائتمگين،
قولوباغلي قالاجاقدير نه واختاجان آذربايجان؟
ايگيدلرين ايران اوچون شهيد اولوب، عوضينه
درد آلميسان، غم آلميسان سن ايراندان، آذربايجان.
اؤولادلارين نه واختا دک ترکي- وطن اولاجاقدير؟
ال- اله وئر، عيصيان ائله، اويان، اويان، آذربايجان.
بسدي فراق اودلاريندان کول الندي باشيميزا،
دور آياغا، يا آزاد اول، يا تامام يان، آذربايجان.
شهرياريناورييده سنين کي تک ياراليدير،
آزادليق دير منه ملحم، سنه درمان، آذربايجان
​

 

[گل همیشه بهار]

ياتا بيلمه ييرم




بو گئجه من کي ياتا بيلمه ييرم باشي باشلاره قاتا بيلمه ييرم
يوخوسوزلوق مني قاتلاشديردي من بو نامرده باتا بيلمه ييرم
اؤغري قالديردي قازان – قابلامامي کيم ال آتسين حاجاتا؟ بيلمه ييرم
اؤغرونون کيم يئتيريب اؤمباسين ازيخليا بير زؤپاتا بيلمه ييرم!
آيليق آلدوق ، ا وئرديک گئتدي نه يئيه ک ، اي واي آتا ! بيلمه ييرم
ده ده ميز يؤخ ، کيمه چکمک باراتي کيمي سالماخ باراتا بيلمه ييرم
جيب ده قالميشسادا بير بئش ماناتيم نه آليم بئش ماناتا بيلمه ييرم
ده لي شيطان دئيري : يؤرقاني سات! قيشدي ، يؤرغاندي ، ساتا بيلمه ييرم!!
قار دئيير گل کيشي سن پامبوغ آتاق کيشي ! من پامبوغ آتا بيلمه ييرم!!
هي گليب ، مندن آليرلار شتلي کيم ساليب مازي ماتا بيلمه ييرم؟
زندگانليق قؤراتا بير شيئي اؤلوب َيه لازم قؤراتا بيلمه ييرم
بير سوموک دور کي بؤغازلاردا قاليب کيم آتا ياکيم اوتا بيلمه ييرم
قار- ياغيشدا بونه قؤندوم – کؤشدوم؟ نيه دوشدوک بو اؤتا بيلمه ييرم
بو کتابلار ئؤزي بير آت يوکودور بوني کيم چاتسين آتا بيلمه ييرم
چاي سيزام تاپميورام چاي پاکاتين نه گليب بو پاکاتات بيلمه ييرم
هي سؤيوقدان قورولوب بيگ دورورام کيمدي يئنگه - موشاتا بيلمه ييرم
ال کي دوتمور يازام ، ال تاپاقدا قلمه يا داواتا ، بيلمه ييرم
گئجه ميز صبح اؤلاجاق يا هله وار؟ باخيرام هي ساعاتا بيلمه ييرم
قوش اوچار ، آمما نه درمان ائله مک؟ داش ده گن قؤل قاناتا بيلمه ييرم
آي قاداشلار ! منه بير ال يئتيرون يوک آغيرلاشدي چاتا بيلمه ييرم
طبع شعريم دايانيب ، سؤنجوق آتير من ده کي سؤنجوق آتا بيلمه ييرم
​

 

[گل همیشه بهار]

حکيمه جان!




سن وطندن ساري قلبين دويونورسه،ماراليم!
وطنين ده ماراليندان ساري قلبي دويونور.
وطني باغريوا باسسان سه وينرسن ينه سن
که وطن ده بالاسين باغرينا باسسا سه وينر.
منيم عشقيم اوجاليب غوربت اولوب دنيا منه
دوست دويانمير دويونور،دشمن اويانمير اونور.


​

 

[گل همیشه بهار]

ايمان مشتريسي




آمان اللاه يِئنه شيطان گليب ايمان آپارا
قُورويون قُويمايون ايمانوزي شيطان آپارا
منيم ، اينسانليغمين گُؤرنه حصاري ياوادير
کـي گونوز غـولِ بيابان گلير اينسان آپارا
خرمني ساققيزا وِئرديک نه يامان چَرچي دي بو
هِي گلير کَنده بيزه درد وئره درمان آپارا
چورَگ آلميش اَلينه ، آج نئجه طاقت گتيسين
اِئله بيريازگئجه سي قيزگليب،اوغلان آپارا
قانلي ديرناخلارينان«انگليس» اَل قاتدي بيزه
باخيسان«روس»دا آرازدان کئچير ايران آپارا
آرادان بيرده بيزي بُؤلسه لر اربابلاريميز
قورخورام قُويميالار تبريزي ، تهــران آپارا
قارا طوفان کي داخي خلقيله شوخلوق اِئله مز
سِئل گرَک اِئل داغيدا،اِئو ييخا،ايوان آپارا
بو قارانليق گئجه لرده قاپوموز پيس دُويولور
نه بيليم ،بلکه اَجَل ديردايانيب جان آپارا
آناما سُويله يين اُوغلون ييخيليب سنگرده
تِئللرين باس ياراما ، قُويما مني قان آپارا
سَلقه لي اُغرو تاپيلميشسا بو باشسيز يئرده
«شهريار»دان دا گرَک بير دُولي ديوان آپار


​

 

[گل همیشه بهار]

هارا قاچسين اينسان؟


جانا گلميشيک بيز بو جانان اليندن
که نه انس امان تاپدي نه جان اليندن
مسلمانه باخ، دين و ايمان قان آغلير
بو دين سيز، ايمان سيز مسلمان اليندن
بو شيطاندي، بيز آدمي گويده تولار
قاچا بيلمز آدم بو شيطان اليندن
آلار اول ايماني، سونداندا جاني
نه ايمان قالار ديبده نه جان اليندن
قاريشقا کيمي دئو نژادي قيميلدير
که خاتم چيخيب دير سليمان اليندن
بادمجان چوخي بازيلاردا کوچوکلر
دا ترپشمک اولماز باديمجان اليندن
خوروز تک بيزي دنله ييب قورتايبدير
چينه قالماييب نو چيکدان اليندن
پناه اولسا بيز خلقه کافر، قوي اولسون
سيخينتي دوشه ک کفره، ايمان اليندن
گئديب چ?لده کي حيوانا يالوارديق
که گلسين، بيزي آلسين اينسان اليندن
ائله تورشاديب ايرانين عيرانين که
گ?زللر گ?زي ياشدي ايران اليندن
ساليب دير اله، سانکي موسا عصاسين
قاچير اژدها لر، بو ثعبان اليندن
نه سلطانلار اولوش الينده اويونجاق
نه گلسين اويونجاقلي سلطان اليندن
بئش- اوچ باش بيله ن ده قاليرسا، اوشاق تک
قاچيب گيزله نيب لر، بوخورتان اليندن
ائويم زندانيم، م?موريم ?وز ايچيمده
هاراقاچسين اينسان بو زنداناليندن
بيزاينسان اولاق، يا که حيوان، امان يوق
نه اينسان قوتارميش، نه حيوان اليندن
نه دئولر که قيطانلا زنجير له نيب لر
قنف لر قيريلميش بو قيطان اليندن
ساليب خلقي درمان آديلن نه درده
که درد آغلايير بيله درمان اليندن
او بيگ خان يازيقلار نه اينسانيميشلار
عبث آغليارديقاو بيگ خان اليندن
وئررديک قديم ديوانا عرضه، ايندي
کيمه عرضه وئرمک بو ديوان اليندن؟
نه طوفانه راست گلميشيک بيز، مگر نوح
گله قورتارا خلقي طوفان اليندن
​

 

[گل همیشه بهار]

بهجت آباد خاطره سي




اولدوز ساياراق گوزله ميشم هر گئجه ياري
گج گلمه ده دير يار يئنه اولموش گئجه ياري
گؤزلر آسيلي يوخ نه قارالتي نه ده بير سس
باتميش گولاغيم گؤرنه دؤشور مکده دي داري
بير قوش آييغام! سويليه رک گاهدان اييلده ر
گاهدان اونودا يئل دئيه لاي-لاي هوش آپاري
ياتميش هامي بير آللاه اوياقدير داها بير من
مندن آشاغي کيمسه يوخ اوندان دا يوخاري
قورخوم بودي يار گلمه يه بيردن ياريلا صبح
باغريم ياريلار صبحوم آچيلما سني تاري!
دان اولدوزي ايسته ر چيخا گؤز يالواري چيخما
او چيخماسادا اولدوزومون يوخدي چيخاري
گلمز تانيرام بختيمي ايندي آغارار صبح
قاش بيله آغارديقجا داها باش دا آغاري
عشقين کي قراريندا وفا اولمياجاقميش
بيلمم کي طبيعت نيه قويموش بو قراري؟
سانکي خوروزون سون باني خنجردي سوخولدي
سينه مده أورک وارسا کسيب قيردي داماري
ريشخندله قيرجاندي سحر سويله دي: دورما
جان قورخوسي وار عشقين اوتوزدون بو قماري
اولدوم قره گون آيريلالي او ساري تئلدن
بونجا قره گونلردي ايدن رنگيمي ساري
گؤز ياشلاري هر يئردن آخارسا مني توشلار
دريايه باخار بللي دي چايلارين آخاري
از بس مني ياپراق کيمي هيجرانلا سارالديب
باخسان اوزونه سانکي قيزيل گولدي قيزاري
محراب شفقده ئوزومي سجده ده گؤردوم
قان ايچره غميم يوخ اوزوم اولسون سنه ساري
عشقي واريدي شهريارين گللي- چيچکلي
افسوس قارا يل اسدي خزان اولدي بهاري
​

 

[گل همیشه بهار]

آزادليق قوشي وارليق




هر چند قوتولماق هله يوخ دارليغميزدان
اما بير آزادليق دوغولوب وار ليغميزدان
(وارليق) نه بيزيم تکجه آزادليق قوشوموز دير
بير مژده ده وئرميش بيزه همکار ليغميزدان
به به نه شيرين ديللي،بو جنت قوشي،طوطي
قندين آليب الهام له ديندار ليغميزدان
ديل آچامدا کارليق داگئدر،کورلوغلوموزدا
چون لا لليغميز دوغموش ايدي کار ليغميزدان
دشمن بيزي ال بير گؤره،تسليم اولي ناچار
تسليم اولوروق دشمنهناچار ليغميزدان
هر انقلابين وور- ييخي صون بناليق ايسته ر
دستور گرگ آلماق داها معمار ليغميزدان
هشيار اولاسوز،دشمني مغلوب ائده جکسيز
دشمنلريميز قورخوري هشيار ليغميزدان
بيرليک يارادون،سؤز بير اولاربيز کيشي لرده
يوخلوقلاريميز بيتديره جک وار ليغميزدان
​

 

[گل همیشه بهار]

شاطر اوغلان


شاطر اوغلان گوروم آللاه سنه وئرسين برکت
قوي اونون ياخشي النسين ،خميرين اللنسين
چوخ پيشير ياخشي پيشير گويده قيريلدات کوره يي
منبر اوسته چوره يين قوي قالانيب تللنسين
تنديرين طور تکين عرشيده ن آلسين ايشيغي
ارسينين بيرق احرار کيمي ميللنسين
کاسيبين قيسمتي يوخ ياغلي پيلوو دوشله ماغا
بو ياوان سنگه يي بيرقوي ساحاليب سئللنسين
قيرتين قورباني سن موشتريني تئز يولا سال
ائل ايچينده ياراماز آرواد اوشاغ وئللنسين
قوي ايکيريالليغي ساتسين خوزه ئين بير ماناتا
ديشي دوشموش قوجانين آغزي نه دير ديللنسين
او منيم شعريمه چوخ ماييل اولان وردسته
دئنه: شاعير چوره يي قوي قوروسون گوللنسين
من ليغيرسا يئيه بيلسم ده فلوس لازيم اولار
بو سوسوز باخچا نه لازيم بو قده ربئللنسين
ساري يازليقدان اولان گوللي قيزارميش سنگک
گره ک آغزوندا اريک تک ازيليب هللنسين
تهرانين غيرتي يوخ شهريار ساخلاماغا
قاچمشام تربيزه تا ياخشي يامان بللنسين
باغچاميز فاسد اولوب ، هر نه ااکرسن اولماز
يئري داشليقدي گره ک توپراقي غربيللنسين
مدعاسي چوخ اولان طبل تهي پربادوخ
نيله يک ضرناچي نين بورنو گره ک يئلله نسين
بو گيجللنمه دن آي چرخ فلک سنده يورول
بو حياسيز گونه گوزلر نه قده ر زيللنسين
سعدي نين باغ گلستاني گره ک حشره قده ر
آلماسي سلله لنيب خرماسي زنبيللنسين
لعنت اول باد خزانه کي “نظامي ” باغينين
بير ياوا گلبسرين قويمادي کاکللنسين
آرزو جلگه لرينده بيز اکن مزرعه لر
دئييه سن ساقه لنيب قوي هله سنبللنسين
قصه چوخ قافيه يوخ آختاريرام تاپميورام
يئريدير شهريارين طبعي ده تنبللنسين
​

 

[مهری]

ناز ایله میسن

چوخلار انجیکدی کی سن اونلارا ناز ایله میسن

من ده اینجیک کی منیم نازیمی آز ایله میسن


​

ائتمیسن نازی بو ویرانه کونولده سلطان

ائوین آباد اولا درویشه نیاز ایله میسن


​

هر باخیشدا چالیبان کیپریگی مضراب کیمی

بیر قولاق وئر بو سینیق قلبی نه ساز ایله میسن؟


​

باشدان آچ یا یلیغی افشان ایله سوسن-سنبل

سن بیزیم بایراممیز سان قیشی یاز ایله میسن


​

سن گون اول قوی غم میز داغدا قار اولسون اریسین

منیم آنجاق ایشیمی سوز و گداز ایله میسن


​

من بو معناده غزل یازمالی حالیم یوخدی

سن جوجوق تک قوجانی فرفره باز ایله میسن


​

کاکلی باشدا بوروب باغلا میان تاج کیمی

او قیزیل ساچدان اونا، گوللی قوتاز ایله میسن


​

او قیزیل دشت مغان دیر قوزی یان-یانه یاتیب

منیم آغلار گوزومی اوردا آراز ایله میسن


​

بو گوز للیک جهاندا سنه وئرمیش تانری

هر قدر ائله سن ایله کی آز ایله میسن


​

من بو سوز یله آتدین آ؛رالاندین بیلیرم

آرانی بیر پارا نامرد یله ساز ایله میسن


​

دستماز ایله دیگین چشمه کلیساده میحا قانی دیر

بیلمیرم هانسی کلیساده نماز ایله میسن؟


​

من(عشیران)اوخوسام پنجه (عراق) اوسته گزه ر

گوزلیم(ترک)اولالی ترک (حجاز) ایله میسن


​

تازا شاعر بوده نیز هر نه باخیرسان دیبی یوخ

چوخ اوتوسان بو غازی اوردهگی قاز ایله میسن


​

بسکه زلف و خط خالین قوپاغین گوتدون

زلفلی نین باشینی آزقالار دار ایله میسن


​

گل!منیم ایسته دیگیم کعبه ییخیلماز اوجالار

باشدادا کج گئده سن دیبده تراز ایله میسن


​

خط خالیندن آلیب مشقیمی قرآن یازارام

بو حقیقت له منی اهل مجاز ایله میسن


​

منی دان اولدوزی سن یاخشی تانیرسان که سحر

افقی خلوت ائدیب رازو نیاز ایله میسن


​

(شهریار)ین داغیلیب داغدا داشا دادالانیب

ئوزون انصاف ایله محمودی ایاز ایله میسن
​

 

[چاووش]

گوزوم آیدین




گوزوم آیدین، گورورم سوگلی قارداشلاریمی


باسمیشام باغریما ئوز دوغما قارینداشلاریمی






آچمیشام قوللاری خلقیمه اوزوک حلقه سی تک


سالمیشام حلقه یه قیمتلی اوزوک قاشلاریمی






فلکین چرخینی سیندیرمیشام اول داشدا


اته گیمده هله ده ساخلامیشام داشلاریمی






آچمیشام قرنمیزین باغلی قالان یوللارینی


تاپمیشام یوز سنه غربتده کی یولداشلاریمی






بو سلیمان دی یانیمدا، گوره سن من اینانیم؟


گاه آچیپ گاه قییرام گوزلریمی، قاشلاریمی






ییغیشین شنلیک ائده ک قرنمیزین بایرامدیر


سیل گوزیمدن بو یوز ایلدن بری گوز یاشلاریمی






یوز باشیم اولسادا، اولسون، یوخ اوزومده قیریشیم


جوانام، کیم نه بیلیر گیزله دیرم یاشلاریمی






قوچی قربانلاریمی کسدی وطن اویناشیمیز



قانیمی خیرات ائدر کن یدی بوزباشلاریمی






آنا اویناشیمی غیرت گوزی گورسه کور اولور


من نه گوزله گوره بیللم وطن اویناشلاریمی






گئده لیم قافقاز اوشاقلارینی تجلیل ائده لیم


شهریاریم، دارا ساققلاریمی، ساشلاریمی​